Archive for month: urtarrila, 2024

Kuadrillen Batzordeak Udalarekin batera antolatu ditu 2024ko Inauteriak. Aurten otsailaren 17an ospatuko dira eta egunean bertan burutuko diren ekitaldiak Entzutegian izango dira: haurrentzako jolasak, Oibarko Txarangak alaitutako txokolate jana, herri afaria eta Dj Iraitz Gonzalez.

Betiko legez, afariko txartelak otsailaren 3, 4, 10 eta 11n El Perrillas tabernan erosi ahal izango dira 19:00etatik 21:00etara.

Kale-katuak kudeatzeko asmoz, joan den irailean, Oibarko Udalak Comarcats elkartearekin hitzarmen bat sinatu zuen. 

19/2019 Foru Legean eta 94/2022 Foru Dekretuan irakur daitekeen bezala, udalei dagokie kolonia felinoak sortzea, kontrolatzea eta mantentzea. Gainera, kokapen-baldintzei eta betekizun higieniko nahiz sanitarioei buruzko arau batzuk jasotzen dira. Lege horiek Nafarroako animalien babes eta ongizaterako esparru orokor bat ere ematen dute. Kolonia felinoa zer den definitzen dute, eta udalen, udalaz gaindiko erakundeen edo eskualdeen erantzukizuna ezartzen dute haien kontrolean eta baimenean.

Aipatutakoa aintzat hartuz eta kaleko katuen ongizatea bermatzeko, Oibarko Udalak hitzarmen hau sinatzeko erabakia hartu zuen.

Udala eta Elkartea lanean hasi ziren lehen unetik, 3 boluntariok beren laguntza eskaini zuten eta sortuko diren hiru kolonia felinoak kudeatzeaz arduratuko dira. Esperientzia pertsonal handia izateaz gain, pertsona horiek kolonia felino bat kudeatzeko moduari buruzko prestakuntza jaso dute, Udalak baimendu eta egiaztatu duena.

Boluntarioek kolonia felinoen zaintzaile-elikatzaile rola hartzen dute. Kolonian katuak zaintzeaz eta elikatzeaz arduratzen dira, animalien ongizatea eta ingurunearen osasungarritasuna bermatzeko ezarritako jarraibideei jarraituz.

Lehen esan bezala, 3 kolonia sortuko dira: igerilekuetako aparkalekuan, Amalurko parkean eta Monolitotik gertu dagoen biltegian. Kolonia bakoitzak etxola bat, pentsuarentzako tobera bat eta Udalak eskuratutako edontzi bat ditu.

Kokapen zehatza esteka honetan kontsulta daiteke: https://earth.google.com/web/data=MkEKPwo9CiExbEVxWFEtUmVnRVlDVUxiVDlxT243UlNhM3NhOVlUZ28SFgoUMDMwMkE1NjNBNzJCRDI1QUEzRDAgAQ

Kolonia Felinoaren sorrerak 2.500€-ko aurrekontu-partida du 2024 honetarako. Horrez gain, Udalak dirulaguntza bat eskatuko du, %70eraino irits daitekeena.

Zer da kolonia felino bat?

Kolonia felinoak eremu jakin batean elkarrekin existitzen diren katu komunitarioen taldeak dira. Normalean hiri-inguruneetan ematen dira kasu hauek.

Oro har, abandonatutako katuek edo esterilizatu gabeko basakatuek osatzen dituzte kolonia horiek, gerora ugaldu egiten direnak.

Albaitaritza Zerbitzua

Koloniek albaitaritza-zerbitzu bat dute, esterilizazioaz, desparasitazioez, gaixotasunen kontrolaz, nahitaezko txertaketez eta animalia gaixo edo zaurituen tratamenduaz arduratzen dena. Identifikatutako animalia bakoitzak fitxa kliniko bat izango du, bere identifikazioa eta osasun-datuak barne.

CES metodoa

Ondorengo estekan metodo honi buruzko informazio gehiago kontsulta daiteke: harrapaketa, esterilizazioa eta askatzea.

https://www.comarcats.org/m%C3%A9todo-ces/qu%C3%A9-es-el-m%C3%A9todo-ces

Nola lagundu dezaket boluntarioa ez izan arren?

Lagundu nahi duten bizilagunek era askotara egin dezakete, baina garrantzitsuena KATUAK EZ ELIKATZEA da.

Kolonietako katuak osasun- eta higiene-pentsuaz baino ezin dira elikatu, eta boluntarioak arduratzen dira horretaz.

Nola lagundu Comarcats Elkartea?

1. Katu bat adoptatuz. Katu bat adoptatzeko, COMARCATSekin harremanetan jar zaitezke edozein kanaletatik. Hemen ikus dezakezu adopzio-kontratuaren eredua.
2. Harrera-etxe gisa eskainiz, formulario hau betez.
3. Dohaintza bat eginez, kontsultatu Donaciones gunea.
4. Egitasmoa zabaltzen lagunduz, sare sozialetan COMARCATS jarraituz eta partekatuz.
5. Boluntarioa izanik, formulario honen bidez erregistratuz eta Elkarteak jakin behar duzun guztia azalduko dizu.
6. Artikuluak dohaintzan emanez gero, WhatsApp bidez jar zaitezke harremanetan eta Elkartearekin entrega antola dezakezu.

Esteka honetan COMARCATSen webgunea bisitatu ahal da, Oibarren sortu berri dena barne.

https://www.comarcats.org/m%C3%A9todo-ces/ces-aibar

Joan den azaroan, Administrazioa herritarrei hurbildu nahian, zerbitzu berri bat jarri zen martxan. Administrazioarekin edozein tramite egiteko orduan herritarraren desplazamendua ekidin ahal izateko sortzen da zerbitzu hau. Udalerrietan langile publiko kualifikatuen laguntza baliatuz, arrakala digitala gainditzea bilatzen da. Hala, langile horiek informazioa eman ahalko dute eta, nahi izanez gero, Internet bidezko kudeaketak egiten lagundu.

“Administrazioa zugandik hurbil” programak Administrazioak dagoeneko lurraldean ematen duen zerbitzuaren eraginkortasuna hobetzea du helburu, honako ekintza hauen bidez herritarrengana hurbilduz:

• Gobernuaren Ordezkaritzan ematen diren zerbitzuei eta beste lurralde-administrazio batzuen eskumenekoak direnei buruzko informazioa ematea.
• Gobernuaren Ordezkaritzak berak, INSSek, SEPEk eta DGTk eskuragarri dituzten online zerbitzu publikoen karta azaltzea.
• Eskatutako prozedurak in situ izapidetzea, ahal denean, edo, hala badagokio, beharrezko datuak biltzea, ondoren izapidetzeko eta interesdunari jakinarazteko.
• Herritarren Karpetaren eta Sarbide Orokorreko Puntuaren abantailen berri ematea.
• Herritarrei identifikaziorako eta sinadura digitalerako bitartekoak lortzen laguntzea (Cl@ve Sistema eta Ziurtagiri Digitala), zerbitzu publikoetara aurrez aurre joateko beharrik gabe sartzeko aukera ematen dutenak.

Horrelako ikastaroak herritarrentzat oso baliagarriak izan daitezkeela uste dugu. Horregatik, datorren asteazkenean, urtarrilaren 31n, 11:00etan, Oibarko Udalaren bulegoetan egingo den ikastaroan parte hartzera gonbidatzen zaituztegu.

Gaur arratsaldean, “Aibar/Oibar iruditan” VI. Argazki Lehiaketaren sariak banatu dira Jubilatuen Klubean. Ainhoa Orzanco eta Asier Martinez kultura zinegotziak izan dira sariak banatu dituztenak, parte-hartzea eskertu eta irabazleak hautatzeko zailtasuna adierazi dutelarik.

Nabarmentzekoa da irabazleak, Roberto Elizalde Juantok, Zangozako bizilagunak, irin-fabrikan egindako argazki batzuk partekatu nahi izan dituela. Horietan, argazki irabazlea ez ezik, Purroy familiak emandako informazioari buruzko aipamen bat ere badago. Esteka honetan ikusgai daude argazkiak.

https://sites.google.com/view/conocer-aibar-oibar/lugares-y-gentes-con-historia/la-antigua-harinera